_ هو أنتِ مش ناوية تكبري و تاخدي قراراتك من دماغك يا مريم! مامتك إللي منقيه الشقة كلها يا حبيبتي فين شخصيتك؟! _ ماما بتساعدني يا نوح أي المشكلة! _ لا دي مش مساعدة دا فرض رأي! أنتِ مخترتيش أي حاجة في الشقة، ولا في الشبكة هو أنا هتجوز أمك؟! _نوح عيب إللي بتقوله دا على فكرة _ ما دا مش طبيعي، أنتِ مهمشة رأيك، و مامتك بتختار كل حاجة، طب لو كان العكس كان زمان قيمتي عليا الحد، و أظن يعني إن دي حياتنا، مامتك مش هتقولك تعملي أي كمان بعد الجواز _ يا نوح ماما بتساعدني مش أكتر، و هي ذوقها حلو و أكيد فاهمة عننا _ مريم بصريح العبارة أنا مش حابب مامتك تدخل، الموضوع خانقني، و مش عاجبني أصلًا الحاجات إللي بتنقيها، و بعدين لو كان أهلنا بيفهموا أكتر مننا، كانت أمي و أمك نزلوا جابوا لينا كل حاجة و إحنا ركنا في البيت _ طب أسكت بقا عشان ماما جاية علينا و هتزعل من كلامك دا _ لا أنا مش هسكت، طلاما أنتِ مش هتتكلمي هتكلم أنا _ في أي يا ولاد انتوا بتتخانقوا!؟ مسكت في نوح عشان ميتكلمش بس هو برضو أتكلم _ معلش يا طنط كنت عايز أتكلم مع حضرتك، أنا مش عاجبني الوضع دا _ وضع أي! و في أي، مش وقت خناق على فكرة أنا نقيت الديكور إللي هيتحط في الشقة يلا عشان نكمل أدخل أدفع يا نوح يلا مفيش وقت ورانا حاجات كتير _ طنط أنا عارف مجهودك معانا، بس أنا عايز اجيب حاجة بيتي أنا و مريم مع بعض، نختارها إحنا لواحدنا _ و انتوا تعرفوا أي في الحاجة دي عشان تجبوها هيضحك عليكوا، مش هتعرفوا تشتروا حاجة _ عادي أي المشكلة هنتعلم، ما مريم مش هتفضل معتمدة عليكي _ لا لا أنتوا مش بتعرفوا تشتروا حاجة، و هتعكوا في الإختيارات، أنا عارفة بعمل أي _ طنط يعني ماكنتش حابب أقول كدا، بس أنا مش مرتاح أصلًا للحاجة إللي حضرتك بتختاريها _ نعم! و أنت تفهم أي في حاجة الفرش أصلا عشان تقول مرتاح ولا مش مرتاح، أنا بجيب لبنتي أحسن حاجة _ أنا ماقولتش إن حضرتك بتجيبي حاجة واحشة، أنا عايز أنا و مريم نجيب حاجة بيتنا لواحدنا، عايز يكون اختيارنا، حضرتك حتى مش بتاخدي رأينا، مهمشة رأي مريم، مش بتسأليها، أنا بستأذن حضرتك إحنا هننزل نجيب الحاجة لواحدنا _تصدق إنك بجح، يعني بدل ما تشكرني عشان بنزل أجيب حاجة بيتكوا، تقولي عايزين ننزل لواحدنا، أنزل هات الحاجة إللي عليك لواحدك، لكن حاجة بنتي أنا إللي هجبها، و بعدين هي معترضتش أصلًا، تيجي أنت و تعترض _ حضرتك بجد بتغلطي فيا و أنا بتكلم بكل إحترام! و شكرتك قبل ما ابدأ كلامي! _ بقولك أي إحنا نلغي الجوازة، أنا مش هجوز بنتي لحد قليل الذوق مش بيقدر تعب غيره، روح أنت يا حبيبي شوف واحدة تجيب معاك الفرش يلا يا مريم _ يلا يا مريم أي! و جوازة أي إللي نلغيها، دي مراتي إحنا كاتبين الكتاب حضرتك يعني لو عايز أخدها معايا هاخدها _ نوح عشان خاطري أهدى، بلاش مشاكل خلاص يا ماما بقا _ اسكتي أنتِ، و أنت أنا هكلملك أبوها و أخواتي يجيوا يشوفوا قله أد.بك دي _ أنتِ كبرتي المشكلة جدًا يا طنط، مش كفاية مطلعة بنتك شخصيتها ضعيفة، كل إللي قولته ادينا مساحة حتى نفهم دماغ بعض، أنتِ مش عطيانا مساحة _بلا مساحة بلا مربع، الموضوع انتهى، و هتطلقها و الجوازة دي مش هتم، أنت خلاص كشفت حقيقتك _ يا ماما أي إللي بتقوليه دا، أهدي يا ماما، يا نوح كبرت الموضوع يا نوح _ استني يا مريم بقا طلاما وصلنا لهنا، أتفضلي يا طنط اتصلي بقا براجل أتكلم معاه عشان الشرع بيقول أخدها دلوقتي حالًا ولا حد يعرف يقولي بتعمل أي، و أنا مش هتكلم مع ست، هاتيلي راجل بقا أتكلم معاه _ يا ماما يا نوح إحنا في الشارع مينفعش إللي بتعملوه دا عشان خاطري _ أنا مكبرتش حاجة، بس أنا ماجبتش ماما يا مريم، أمي منزلتش معانا في أي حاجة، و امك هي إللي بتنزل و بتجيب كل حاجة على مزاجها بس أنا جيت أخري _ امك أي إللي تيجي معانا، بتاع أي بقا إن شاء الله دي شقة بنتي، و انتوا أصلًا ذوقكوا يقر.ف _ طب أنا مش هرد عليكي عشان أنتِ ست كبيرة و لحد الآن أنا محترم نفسي، أنا هرد على راجل، بس هجيب أمي بقا ترد عليكي…. _هو أنتِ مفكرة إن محدش هيعرف يرد عليكي عشان أبني محترم، جوازة أي إللي عايزة تلغيها، وحاشرة نفسك فيها لي! _ أنتِ مالك انتِ، و إزاي تكلميني كدا أصلًا _اومال مفكرة إنك هتغلطي في أبني و مش هتلاقي إللي يرد عليكي، نوح راح يقعد مع أبو مريم، لكن أنتِ لازم إللي يوقفك عند حدك _ و أنتِ بقا إللي هتوقفيني! _ بقولك أي اطلعي من الجوازة دي يا ست أنتِ، متخربيش على أبني، عشان وربي و ما أعبد لو فكرتي تضايقيه تاني، أو تحشري نفسك في الجوازة لهاجي أفرج عليكي الشارع، يا ست يا سو أنتِ، سيبي العيال في حالها بقا دول على وش جواز _ أنتِ بتهد.ديني! _ اه بهد.دك و أبقى أدخلي تاني كنت خايفة الجوازة تبوظ، و شايفة المشاكل بتزيد بسبب تحكم ماما الزيادة، أنا عارفة إن نوح معاه حق، بس مش عارفة أقول لماما لا، مش عارفة أخد وقفه مع الموضوع، بس أنا بحب نوح، و مش متخيلة إن الجوازة تبوظ _ نوح بليز بلاش مشا.كل _ أنا هتكلم مع باباكي بس يا مريم نحط النقط على الحروف، عشان الموضوع دا مينفعش و الكلام إللي مامتك قالته ميصحش و مينفعش و هيعمل مشاكل _ السلام عليكم، خير يا نوح في أي قلقتني! _ و عليكم السلام، بص يا عمي أنا جاي استشيرك في إللي بيحصل و أنت تحكم، يرضيك والدة مريم تدخل في كل كبيرة و صغيرة و مهمشة رأينا! و لما اشكرها بكل إحترام و أقولها عايز أنا و مريم إللي نختار حاجة الشقة لأن دي حياتنا، ولازم نتعود نختار و تشتري و نفهم ذوق بعض تغلط فيا! مامتها قالت بعصبية _ أنا مغلطتش فيك بلاش كذب _ أهو حضرتك قدامك أهو، دا يرضي مين! و عايزة تبوظ الجواز و بتقولي تطلقها، هو انا عيل صغير؟! _ لا طبعًا ميرضنيش، أي لعب العيال دا! من حقك تختار إللي عايزة _ أي إللي بتقوله دا وهما دول يعرفوا يختاروا حاجة! _ و أنتِ مالك، يختاروا حلو يختاروا وحش هما إللي هيقعدوا فيها _ ما دا في وشنا، يرضيك الناس تقول جايبين ابنتهم حاجات واحشة؟! _ دي شقتهم برضو و هما حرين حسيت إن بابا و نوح عطوني الجراءة أن أتكلم _ ماما لو سمحتي أنا عايزة أختار مع نوح حاجة بيتنا لواحدنا، حضرتك تعيتي معانا أوي تسلمي بجد، بس أنتِ مأختيش رأي في أي حاجة، دا في حاجات برضو جبتيها يا ماما أنا مش عارفة بتاعت أي، في حاجات أنا مش حباها، أنا عايزة أبدأ مع نوح نختار كل حاجة احنا عايزينها و حابينها _ آه طلعت انا الوحشة دلوقتي، و وقفتي في صفة _ و أي يعني لما تبقى عايزة تختار حياتها و شايفه إن دا الأفضل ليها، العند دا هو إللي هيخر.ب حياتهم، اديهم فرصة يكتشفوا نفسهم، و يعرفوا دماغ بعض، أكتر فترة بيظهر فيها الاختلاف و الأذواق و الشخصية الحقيقة هي الفترة دي، اديهم فرصة يبنوا حياتهم صح _ خلاص طلاما طلعت أنا العائق الوحيد، و أنا إللي عاملة مشاكل خلاص انتوا حرين، رغم متأكدة إنكوا هيضحك عليكوا، و مش هتعرفوا تشتروا، بس براحتكوا هنسحب أنا أما نشوف، و على فكرة يا نوح مامتك أتصلت بيا و بتهددني _ و أنا متأكد يا طنط إن الوضع لو كان العكس كنتي هتعملي نفس الشئ عشان سعادة بنتك، و كنتي هتقولي عليا ابن أمي، و ماكنتش هتقبلي الوضع، كل الحكاية الوالدة عايزة حياتي مستقرة _ و أنا إللي بعمل مشاكل _ دا إللي واضح، حضرتك كبرتي الموضوع، و كل دا و إحنا لسه مدخلناش في الجد، يعني حضرتك لو فضلتي تدخلي في حياتي أنا و مريم حياتنا هتكون كلها مشاكل، فين الخصوصية بقا؟! _ اعملوا إللي تعملوه انتوا حرين رفعت أيدي منكوا، بس متجيش بقا تعيطي لما تلاقي شقتك كلها عك عدى كام يوم و نزلت أنا و نوح نشتري حاجات، و كنت خايفة إن فعلًا شقتي تكون مش حلوة، أو اعك في الاختيارات زي ماما قالت _ نوح تفتكر هنعرف نشتري حاجة البيت أنا خايفة _من أي يا مريم، أي الصعب في إختيار حاجات الشقة يا مريم _ خايفة يكون الحاجة مش لايقة على بعض، و الشقة تطلع مش حلوة _ بصي يا مريم، ركزي معايا، دي شقتنا إحنا هنشتري إللي يعجبنا و نليقه على بعض، ولو معجبناش في الشقة نغيرها أو نبدلها، حتى لو أضحك علينا مرة هنتعلم عشان ميصحكش علينا في التانية، هتعرف دماغ بعض أكتر، مريم إحنا مش في امتحان و مستنين التقييم، إحنا بنبدأ بداية جديدة، ودا شوية عفش، سهل يتغير سهل نجدد، لكن إللي مش سهل هو أننا نفهم بعض، لازم نشوف هنواجه أي، حتى لو اختلافنا في حاجة لازم نلاقي نقطة مشتركة نتفق فيها، كل كلامي من الأول هو إننا نواجه اختبار حقيقي لواحدنا، فهماني _ فهماك، أنت طمنتني، أنا حاسه إن كنت داخلة تقيم، و إن كل الناس مستنية تشوف شقتي، و إنها لازم تكون بيرفكت _ حبيبي إحنا مش محتاجين نرضي حد، إحنا محتاجين نكون حابين إللي جايبينه، و مرتحين فيه، مفيش حاجة بيرفكت غيرك يا مريم _ طب أفرض مثلًا أنا عجبني حاجة و أنت لا _ هنلاقي نقطة مشتركة، هندور على حاجة تانية تعجبنا، هنختار إللي لائق أكتر، كل دا هنعدية سوا يا مريم، التجهيزات آه مش سهلة، بس إحنا هنسهلها ونعمل ذكريات، متقلقيش من حاجة يا مريم، مع بعض هنهون كل حاجة _ بسمع أنها فترة صعبة كلها مشاكل و خناق _ المشاكل و الخناق معاكِ كمان لذيذ أي المشكلة، نتخانق نتصالح، مهو الحياة كدا، مش كلها عسل يا عسل، حبه ك.ا و حبه كدا و أنا في الحالتين بحبك _ والله أنت إللي عسل يا نوح في فترة تجهيز الشقة طبيعي يحصل مشاكل و خناق و تدخلات من كل إللي حواليك، المهم تكون عارف تعدي كل دا، و توصلوا لبر الأمان، و تكون متفهم، و توقف التدخلات، و تحولوا الوقت الصعب لدرس تتعلموا منه إزاي تمشوا حياتكوا وقت الضغط و بس كدا 🤎 قول رأيك في الاسكرييت، و أي رأيك في رد فعل نوح وكلامه، و كلام مريم؟! تمت
