طنط

_ طنط حضرتك فاتحة التلاجة بتاعتي لي في حاجة؟! _ بتاعتك! دي تلاجة بني، بشوف ابني جايب لك أي _ أيوا إللي هي بتاعتي برضو، مش فاهمة يعني يتدوري على حاجة معينة؟! _ بشوف جايبلك أي، و بعدين أي دا أي العبط دا، دا توست؟ _ آه ماله التوست! _ جايبلك توست لي ما تعيشي عيشة أهلك و تأكلي عيش بلدي _ لا هو أنا عايشة عيشة أهلي و باكل الأكل دا، ممكن حضرتك تخرجي تقعدي برا _ أنتِ بتطرديني من شقة ابني! _ لا مهو أنا مش ضيفة هنا يا طنط، دا بيتي، و بعدين معلش مش من حقك تفتحي التلاجة و تدوري فيها _ مش من أي يا ختي! دا بيت ابني و دي فلوس ابني إللي الهانم بتصرفها في التفاهة _ حتى لو فلوس إبنك مش من حقك تحاسبيني، دا بيتي زي ما هو بيت إبنك جوزي دخل وبص لينا بإستغراب وأحنا الإتنين ماسكين باب التلاجة _في اي صوتكوا جايب آخر الشارع لي! _ تعالى شوف مراتك، مش راضية تخليني أفتح التلاجة _ لي يا أمي عايزة أي من التلاجة! _ هشوف خيبتها صارف فلوسه على أي! هو بص ليا بإستغراب وأنا كنت متعصبة و ببص ليه _ مش فاهم يا أمي عايزة أي؟! _ هو أنا لازم ابقى محتاجة حاجة، عايزة أشوف صارف على أي، دا لسه هدخل على الدولاب أشوف الهدوم إللي الهانم طالعة نازلة شايلة شنط جديدة _ طب ما تدخلي الحمام بالمرة يا حماتي _ أدخل يا حبيبتي و ما ادخلش لي، الله أعلم جايبة أي جوا _ يا أمي مايصحش إللي بتعمليه دا عيب شهقت بدراما وهي بتضرب صدرها _عيب! أنا إللي عيب، و بالنسبة إللي مابتختشيش و نازلة مصاريف مصاريف دي أي مش عيب ؟! _ يا أمي أي المشكلة مريم مراتي و أنا إللي بقولها تصرف براحتها _ دي جايبة فرختين و توست، و جبن غريبة، دي بتضيع فلوسك _ يضيع فلوسه في الجبن! لي هو مش إحنا بناكلها ولا جايبنها نرميها _ وهي مالها الجبنة القديمة؟! _ جرا أي يا طنط في أي، عايزة مني أي، قولتيلي عيشي عيشة أهلك، هي دي عيشة أهلي، أنتم عايشين بطريقة تانية مش مشكلتي، إنما تدخلي في مطبخي و تفتشي فيه من ورايا و قدامي تقوليلي فلوس أبني والحاجة ابني، لا مش من حقك، يعني أنزل ادور في بيتك و أقولك بيت جوزي؟؟؟ _عشان اكسـ.ر رقبتك _ أنتِ بتكلميني كدا لي، أنا مش جاية من الشارع، و البيت دا لي حدود، و أنتِ ضيفة في بيتي يا طنط _ مريم، عيب كدا أدخلي جوا _ أدخل جوا! أدخل جوا بجد؟ مش شايف بتعمل أي! _مريم ... ادخلي جوا، يلا اتفضلي دخلت ورزعت الباب بعصبية وأنا مش مصدقة العقلية إللي بشوفها دي، كنت مفكرة الحاجات دي مشاكل فيك الناس بتنزلها على النت عشان الريتش، ماكنتش أعرف إنها هتبقى حياتي! دا أنا دخلت الحمام و خرجت لقيتها في تلاجتي، لو كنت أتأخرت شوية كانت وصلت لدولابي و هدومي؟؟؟؟؟ _ إللي حصل دا يا أمي يا ينفعش، عيب هو إحنا جعانين عشان تعملي كدا؟! _ هو أي إللي عيب يا خيبتها، هي لفيتك في صباعها، أنا بشوفك و أنت بترمي الزبالة مرتين، شوفت فيها مرة ازايز عصير و قرف _ أنتِ بتراقبيني؟ و بعدين أي المشكلة مش فاهم؟! _ المشكلة إنك بتصرف فلوسك في هبل، وهي مبزرة، و بتخليك نجيب حاجات مالهاش لازمة _ماما!! أي إللي بتقوليه دا! أنتِ بتهزري؟ _لا مش بهزر، بعلمك إزاي تدبر بيتك، حاسب وريني أما أدخل اشوف تسريحة الهانم، هتلاقيها ماليانه أحمر واخضر ومفلساك يا خايب _تدخلي فين يا أمي مش هيحصل _ وسع من وشي _مش هوسع إللي بتعمليه دا ماينفعش، هو حضرتك شيفاني عيل صغير مش عارف امشي بيتي! _ بقولك حاسب البت كلت دماغك هي سحرتك يا ولا! _ سحراتني أي، و أكلت دماغي أي، عيب إللي بتعمليه دا عيب، مش هتدخلي جوا، اتفضلي يا أمي انزلي _ أنت بتطرديني يا عاق! نسيت إني أمك! _ أنا مش بطردك يا أمي العفو، أنا عايز أحل المشكلة إللي حضرتك بتعمليها _ طب أي رأيك بقا مش هنزل غير لما أدخل اوضه النوم، و أشوف الدولاب و التسريحة، أنا عارفة هي جابت أي في الجواز، أما أشوف في الكام شهر دول جابت أي من فلوسك بقا ..! تفتكروا مامته هتعمل أي وهو هيكون رد فعل أي وأنا ممكن اعمل أي _ يا سلام عايزة تتفرجي على خصوصياتي، بس كدا اتفضلي يا حماتي، هوريكي بصرف فلوس إبنك في أي قولت الجملة دي بعد ما خرجت من الأوضة بكل برود، و قررت أن بدل ما أكون الشخص المدافع، أخد دور المهاجم _حاسب كدا، أنا هوريها كل حاجة، تحبي نبدأ ب أي يا طنط بالأربع أطقم الجديدة إللي جبتهم الشهر دا! ولا بالأسكين كير! هو بص ليا بصدمة، مش مصدق رد فعلي ولا إللي بعمله لكن أنا شديت ايد حماتي على اوضتي وشاورت لها _ أهو اتفضلي، جبت الطقم دا و دا ودا، وحبيت البيجامة دي جديدة، وهدوم البيت دي كمان، وجبت الميكب دا كله، و التلاتة برفان دول، تحفة دول تحبي تشميهم! دول بمبلغ محترم ها عايزة تشوفي أي تاني! حماتي بصت ليا بصدمة، كأنها أمام مجنونة وهمست بذهول _جبني كل دا بفلوس أبني! _ آه ما أنا مراته وهو مش بيستخسر فيا حاجة، برافو والله ربتيه يبقى مسؤول ويدلع مراته أما بالنسبة للأكل بقا، أي رأيك تتعشي معانا نوح بيطلب لينا بيتزا تحفة لازم تجربيها معانا _ أنتِ أنتِ ... أنا ماشوفتش في بجاحتك _ الله لي كدا يا حماتي، مش عايزة تشوفي هو جايبلي أي، و بصرف فلوسه في أي، وريتك يمكن ترتاحي يدل ما تفتشي في الزبالة إللي نازلة و تشغلي دماغك بيا و بحياتي _ أنتِ بتبعتري فلوس ابني إللي شقيان بيها في الهبل دا! _ مهو جوزي و بتعب عشاني و عشان يوفر ليا كل إللي نفسي فيه، ربنا يخليه ليا يارب، دا المفروض تفرحي إن إبنك بيحب مراته _ حبك برص يا شيخة، يا نووح .. يا نووح _ نعم يا أمي، خلصتي جولة في بيتي! مش خلاص بقا ولا أي! _ جولة أي وزفت أي، اي كل إللي مراتك شرياه دا، هي بتسرق فلوسك ؟ مسح على وشه و بص ليا بلوم، لكن أنا بصيت بعند و أبتسمت و أنا برد عليها _ بسرقه أي يا حماتي لو هو أنتِ بتعملي كدا مع ابو نوح برضو! مش مال الراجل هو مال مراته! أكيد نوح متعلم من الحاج مش لسه الحاج جايبلك حلق دهب جديد برضو ؟! _ أنتِ بتقارني نفسك بياا ياللي لسه متجوزة من يومين _ الحمد لله مش بقارن نفسي بحد، ولا ببص لعيشه حد تاني، أنا مركزة في حياتي و مع جوزي، إللي مش مخليني ابص لأي حد. لانه مش حارمني من حاجة _عاجبك كدا!! عاجبك إللي مراتك بتعمله دا بتحرق دمي إزاي أتفرج! _ماما تعالي معايا من فضلك، تعالي هنتكلم زقيته وصوتت في وشه _مش عايزة أتكلم ولا زفت حاسب من وشي حاسب بقولك نزلت وهي عماله تزعق و تشتم و تحسبن عليا، لكن ما اهتمتش، هو بصلي بعتاب _لي كدا يا مريم! _هو أي إللي لي كدا، مش كانت عايزة تشوف الحاجة! وريتها ليها، دي بتبص للعصير أنت متخيل للعصير، أنا مصدومة _ أخرجي من الموضوع وأنا هحله، تجنبيها، عادي بتحصل في أي عيلة هي أمي بس بتحبني زيادة _ هي أي دا إللي بيحصل في أي عيلة إنها تشوف بناكل اي و بنصرف اي! _معلش حقك عليا أمي برضو هقول أي، أنا هحل الموضوع _ أنا ما قولتش أي حاجة على فكرة، وفعلا كنت بعزم عليها بالعشا، أنا محترمة إنها ست كبيرة و أمك، لكن أنا عمر في حياتي ما حد أتدخل في خصوصياتي بالشكل دا عدى يومين محصلش فيهم جديد مامته متجنبه تتكلم معاه، لكن في يوم وهو طالع فتحت الباب و شديته جوا _ في أي يا ماما في أي! حصل حاجة ولا أي أنتِ كويسة! _ تعالى بسرعة أنا جبت الشيخ، ماصدقت لقيته فاضي شوية رد بإستغراب _ شيخ! شيخ أي؟ _ شيخ عشان يشوف العمل إللي هي عملاه ليك مدفون فين؟ _ عمل أي يا أمي وشيخ أي، أنتِ بتهزري؟ _ بهزر أي دا أنا ماصدقت لقيت وقت الشيخ فاضي فيه يجي يشوفك، أدخل أدخل، إنبي إللي معمول ليه عمل أهو يا مولانا، أكيد عمل بالطاعة _ ماما بتقولي أي بجد! الحاجات دي كفر _ وهو أنا إللي عملاه، دي أكيد مراتك، ما أنت مش طبيعي حالتك دي، بسرعة يا مولانا شوفه الواد بيروح مني خرج عن شعوره وبص للراجل إللي قاعد و قاله _ من فضلك مفيش أي حاجة من دي ممكن تتفضل _ يتفضل فين، مش هيمشي من هنا غير لما يشوفك، و يعرف مكان العمل، ولا تكون مشربهولك، تفتكر يا مولانا مشرباه حاجة؟ _ ماما كفاية بقا كفاية، هو مينفعش تشوفيني مبسوط! مينفعش تفرحي إن مستقر في بيتي! لو سمحت يا عم أنت اتفضل مفيش حاجة من دي اتفضل الراجل خرج لما نوح خبط على الباب بعصبية _لي بتعمل كدا! لي مصممه تخرجيني عن شعوري! لي عايزة تخربي بيتي بجد لي! دي حاجة تضايقك لما أكون بحب مراتي و مسؤول عنها! دي حاجة تضايقك! طب لو بتضايقك خلاتيني اتجوز لي و أخد بنت من بيتها ! عشان ابهدلها معايا مثلا؟ يا ماما أنا عماله احاول أحل الموضوع ودي و اصالح من هنا و هنا، و مش عايز ازعلك ولو بكلمة بس إللي بتعمليه دا مينفعش بأي شكل من الأشكال، جيبالي دجال! دخلتي في حوار الأعمال دي امتى! يا أمي أنا مريم مبتطلبش مني حاجة، بس هي بنت أصول استحملت في أول جوازنا لما كنت مديون، ومش معايا اجيب أكل، لي لما ربنا فتحها عليا أبخل عليها! دا بدل ما تفرحي إنك ربتي راجل! _ هي قومتك عليا كمان! _ تاني! أنا حاسس إن مهما أتكلم مش هتسمعيني و كلامي في الفاضي، بصي يا أمي إللي حصل في الشقة فوق دا لو سمحتي من فضلك مش عايزة يتكرر تاني، أنا مش هقول أبدا تطلعيني عيل صغير مش عارف يصرف على بيته ولا يفتحه، لو مريم مضايقاكي أوي كدا تجنبيها، وأنا هقولها تتجنبك _ عايز تقطع معايا؟ _ أنا مش عايز مشاكل، أنا عمري ما هقطع معاكي أنتِ أمي وعلى راسي، لكن مفيش داعي لمريم تنزل مش عايز مشاكل تخلينا ندخل في حوارات كبيرة، بس افتكري يا ماما، إنك في يوم كنت بتبكي بسبب جدتي و معامتها القاسية معاكي، بلاش لما توصلي تكوني زيها، افتكري حياتك كانت عاملة إزاي، بلاش تخلي حياة مراتي كدا من فضلك _ أنا ست مفترية يا بني دا إللي قصدك عليه! _ لا يا أمي العفو، أنا بس .. كل إللي طالبة حياة مستقرة، بلاش تعملي مشاكل، إللي قولتيه يومها فوق صعب جدا إن أسمعه، إنك اخده بالك من الزبالة إللي بتنزل و الأكل و الشرب!!! لي هو إحنا محرومين! عيب بجد عيب، و إنك تجيبي واحد هنا وتقوليلي عمل! عيب يا أمي دا ظن سوء استغفري ربنا، و من فضلك ... بلاش مشاكل، عشان لو المشاكل كبرت أنا هأجر شقة برا _ أنت... أنت بتهددني؟ _ لا يا ماما طبعا بعرفك بس عشان متزعليش لو مشيت عن أذنك مشاكل بتحصل كل يوم، الفرق بس إزاي نوقفها و نتصدى ليها، السكوت و الخضوع ليها مش حل، و المحاربة من طرف واحد برضو مش حل... بلاش تظلموا بنات الناس (وَاتَّقُوا يَوْمًا تُرْجَعُونَ فِيهِ إِلَى اللَّهِ ثُمَّ تُوَفَّى كُلُّ نَفْسٍ مَا كَسَبَتْ وَهُمْ لا يُظْلَمُونَ)

مقالات ذات صلة

الدكتورة

حنين

ابوياوامي

طرودني

يوم التخرج

الشبكه

اترك تعليقاً إلغاء الرد