البلكونه
حور قلبها دق من كتر الخوف وقالتله بتوتر وبصوت مهزوز:
-انت تقصد ايه؟
ابتسم حسام لما حس انه وصل لمراده وانها ابتدت تشك في ياسين وقالها:
-انا بس حبيت انورك احسن ما تتغشي فيه وعشان بس تعرفي اني لما قولتلك ندي علاقتنا فرصة كنت صريح معاكي وبصراحة عرفت قيمتك لما بعدتي عني
حور قالتله بغضب ونفاد صبر:
-اخلص يا حسام وقول اللي عندك وتقصد ايه بكلامك ده عن ياسين
رد حسام ببرود:
هبعتلك فيديو حالا تشوفيه وتعرفي ان ياسين بيه اللي طالعة بيه السما مش زي ما انتي فاكرة وقفل السكة في وشها ومستناش ردها
حور نزلت الفون من علي ودنها وهي خايفة ومرعوبة ورهف ورؤي كانه جمبها وسمعو كلام حسام كله وبصو لبعض بتوتر وبعدين بصو لحور اللي كان قلبها مقبوض وخايفة تتصدم في ياسين هو كمان وفجأة سمعو التلاتة صوت مسدچ بصو لبعض كلهم بخوف وحور اللي ايديها اترعشت اول ما الفون رن ورهف بصتلها وحاولت تخفف عليها التوتر ده وقالتلها وهيا بتطبطب عليها:
-شوفي يا حور بعت ايه ومتخفيش ده اكيد كداب
حور بلعت ريقها بخوف وفتحت الفون واتفاجئت انه حسام بعتلها فيديو لياسين وهو قاعد علي ترابيزة في كافيه قدام بنت لا مش اي بنت دي نفس البنت اللي قالت انها خطيبته وكان ماسك ايديها وبيضحكو سوا وشوية وباس ايديها
حور كانت بتتفرج علي الفيديو ودموعها نازلة وقلبها لتاني مرة بيتجر*ح والمرادي شافته بعينها وهو بيحبها وبيتغزل فيها وكمان بيبوس ايديها ، رهف ورؤي حضنو حور ورؤي قالت:
-اكيد في حاجة غلط ازاي يعمل كدة
حور اتكلمت بهدوء وهي بتبعد عنهم:
– لو سمحتو عايزة اقعد لوحدي محتاجةاكون مع نفسي
رؤي ورهف بصو لبعض وخرجو بهدوء وسابوها لوحدها واول ما خرجو حور اترمت عالسرير وفضلت تعيط مش عارفة ليه دايما مش مكتوبلها تفرح كان نفسها تعيش مع ياسين ويكون هو عوضها بس للاسف شافته بعينها مع نفس البنت اللي كدب عليها و قالها انها متهموش وانه مش بيحبها وفجأة قامت وقفت ومسحت دموعها بضهر ايديها قررت انها مش هتكون الطرف الضعيف تاني ابدا وعلي قد ما وجعها من ياسين اكتر بكتير لانها حبته بجد وحست معاه احاسيس كتير جميلة ومحستهاش مع حسام بس خلاص هيا مش هتضعف تاني ابدا ولا هتبينله انه خدعها
