جواز صالونات
حطيت الشريط في جيب الكوت بتاعي بسرعة وقلت بتوتر: “مفيش يا حبيبتي.. كنت بشوف الدوا بتاعك خلص ولا لأ.”
مريم قربت مني، حطت الكيس، وبصت في عيني مباشرة وقالت بنبرة هزت ثقتي في كل حاجة:
“أحمد.. أنت بتكذب عليا.. أنت مخبي حاجة من ليلة امبارح.. الرسالة اللي جاتلك على الموبايل كانت من مين؟”
بلعت ريقي ومبقتش عارف أقولها إيه.. أقولها إن أمك ميتة مقتولة؟ أقولها إن الدكتور اللي فاكراه أبوكي الروحي هو القاتل؟ ولا أقولها إن تامر ابن خالتك مشترك في المصيبة؟
وقبل ما أنطق.. جرس الباب رن بصوت متصل ومزعج.
مريم راحت فتحت الباب.. ودخل الدكتور مدحت، وكان معاه تامر.. والاتنين ملامحهم كانت متغيرة تماماً، مفيش الضحكة الحنينة ولا الودود.. الدكتور مدحت كان ماسك في إيده حقنة صغيرة مجهزة، وتامر قفل الباب وراه بالمفتاح وحط ضهره عليه وهو بيبصلي بنظرة برود قاتلة!
الدكتور مدحت خطى خطوة لقدام، وبص لمريم وقال بصوت هادي ومرعب:
“مريم يا بنتي.. اطلعي في أوضتك ارتاحي.. أنا جاي أدّي أحمد جرعة الدوا بتاعته.. عشان يرتاح من التفكير!”
بصيت لتامر وبصيت للمحضر اللي في جيب جيليه الدكتور، وعرفت إن السر كله انكشف، وإن المواجهة الأخيرة بدأت حالا جوه شقتنا! حكايات رومانى مكرم تابعو صفحه رومانى مكرم
الدكتور مدحت قفل الباب وراه بالمفتاح، وتامر فضل ساند ضهره عليه وهو بيبصلي بنظرة خالية من أي رحمة. مريم وقفت في النص بيننا، عينيها بتروح بين الحقنة اللي في إيد الدكتور وبين وشي المرعوب، وقالت بصوت بترعش:
“في إيه يا دكتور؟ أحمد ماله؟ وحقنة إيه دي اللي هيدها له؟”
خطيت خطوة لقدام وزقيت مريم ورا ضهري عشان أحميها، وطلعت شريط الحبوب اللي لقيته في علبة الدوا ورميته في وش الدكتور مدحت وزعقت بعلو صوتي:
“كفاية تمثيل لحد هنا يا دكتور! اللعبة انكشفت.. شريط الحبوب ده اللي موّت أم مريم في الرعاية المركزة، ونفس الشريط اللي كنت ناوي تصفي بيه مريم وابني عشان تاخد الشقة والعمارة وتنتقم من عيلتها كلها!”
مريم صرخت وحطت إيدها على بوقها وهي مش مصدقة، بصت لتامر وقالت: “تامر! أنت واقف معاه؟ ده . أمي! أنت بتساعد قاتل خالتي؟”
تامر ضحك بسخرية وغل وقال: “خالتي؟ خالتي دي اللي أكلت حق أمي في الميراث ورمت لنا الفتات؟ الدكتور مدحت هو اللي رجعلي حقي.. الشقة دي والعمارة دي من حقنا إحنا، وأنتِ وأمك أخدتوا أكتر من حقكم وياما اتذللنا ليكم!”
